بسم الله الرحمن الرحيم

الحمدلله رب العالمين والصلاة والسلام على اشرف الانبياء محمد وعلى اله الطيبين الطاهرين..اما بعد،،

دنيا...مافي بالدنيا انسان ما صارت له مشكله مع واحد ...وما في بالدنيا انسان ما يغلط...وولكن في بالدنيا انسان اذا زعل من واحد يندم على الي صار ويتمنى الزمن يرجع، انا اقولك ياها لا تنطر الزمن يرجع انت روح عدل الي سويته اذا كل مرة تبي تتغلى ما راح تلقى احد يمك وبهالدنيا ما ينفع التغلي..دنيا يوم معاك يوم ضدك تلقى الزمن تحول من زمن وفا الى ذل كل واحد يبيع صاحبه على اشياء تافه وانا اقول لا تظنون ان السعادة دايما معاكم انا اقول انسا زمان راح وتذكر احبابك لانهم الي راح يبقون الدنيا بدون ربع ما تسوى شي، هالدنيا لازم فيها اشياء تجرح ومالك الا احبابك فانا اقولك تذكروهم ولا تخسرونهم على اشياء تافه اهمه الي راح يبقون معاك اهمه الي راح يوقفون معاك بس تقدر تلقى هالانسان الي تبيه؟؟اسال نفسك لا تسالني..

بسم الله الرحمن الرحيم

الحمدلله رب العالمين واللصلاة والسلام على محمد واله الطيبين الطاهرين ...اما بعد ،،



قال تعالى في محكم كتابه:-

(( وقل اعلموا فسيرى الله عملكم ورسوله والمؤمنون ))

العمل العمل ... كلمة وايد سمعتها كلمه وايد اقولها كلمة وايد قالولي سوها...

تقولها سهل بس احيانا تكون صعب تطبقها مثل ما نصحني واحد وقالي انت لديك طموح اسعى اليه لانك تملك طاقات لا تستهان بها بعد التفكير بهالجمله تبين مو بس انا عندي طاقات كل الناس عندهم طاقات بس كل واحد غير عن الثاني واحد طاقته كبيره وواحد صغيرة وواحد يعرف يستخدم هالطاقه صح وواحد ما يعرف يستخدمها، والعمل اهو اساس اي هدف اذا كان عندك هدف وودك توصل اليه لازم تعمل علشان توصله ومو اي عمل العمل الي تتعب فيه وتشتغل عدل، وانا من الناس الي لمن اشتغل ما حب اشتغل اي شغله اذا اشتغلت لازم اسوي الشغله صح مادام انا قاعد اتعب خل اتعب على شي يسوى مو على شي مو عاجبني شغله وترا الجودة من شروط نجاح العمل واذا كان العمل يستحق سو كل الي تقدر عليه، وحلاة الانسان يشتغل من نفسه مو يعتمد على غيره مثل ما نقول بالكويتي عيزان ماله خلق اشتغل اشتغل شوراك، ومثل ما قلت بتوصل حق هدف اعمل واشتغل بكل جهد واطلب المساعد ترا مو عيب، واذا تبي تتقدم بحياتك لازم تعمل وتجتهد...فانصح كل واحد يشتغل مثل منصحني صاحبي الي يهتم حق مصلحتي وهاذي نصيحه انا بعد اقدمها حق الي عنده استعداد يعمل ويجتهد ويوصل حق هدفه الي يبيه...

بسم الله الرحمن الرحيم

والحمدلله رب العالمين والصلاة والسلام على اشرف الانبياء والمرسلين محمد واله الطيبين الطاهري..اما بعد،،،

خلصت من المخيم وخلصت العطله ودخلت المدرسة ومالي مزاج وطول العطله سهران بليل بنام حق المدرسه ما تيلي النومه دخلت المدرسة وانا دايخ شعري معفس وامش عوي يي واحد يسلم هلا مادري منو بس قاعد اسلم اوصل ليه الصف سلام عليك اقعد على كرسي احاول اصح صح شويه لمن بديت اتقلم واصحصح قمت ادور اسلم على ربعي تلقى ناس سلمت عليهم وانا دايخ سلمت عليهم مرة ثانيه يعني عادي اكبر انسى طق الجرس والحين طابور (( لا تقولون شخباري طابور كنتوا نفسنا )) طبعا محد قاعد يشتغل واساتذة الالعاب يصارخون ومحد يعطيهم ويه ولا عندهم عقاب يديد ايي يقعدون على الارض ربع ساعه بعدين اوقفوا ما يدرون انهم قاعد يريحونا خلص الطابور دخلنا اول حصة ولا استاذ الرياضيات الله (( لا )) يذكره بالخير ومن اول يوم قاعد يصارخ ويدرس بس شنسوي معاه معاه طبعا هذا الفصل يمتاز بالتقارير والفصول طبعا صارت هواية عند استاذ الرياضيات الفصول والتقارير بس شي واحد ما يقدر يعطيه الاستدعاء(( بيني وبينكم يخاف من اولياء الامور )) المهم امتحنا التفرة الثالثه نصنا مزفت بس زينا يبنا درجات زينه ما عدا الرياضيات والعربي الي ما يابوا زينا (( طبعا ما عدا المعقدين )) كملنا الاسبوع الي خلصنا فيه امتحانات الي وراه امتحانات قصيرة (( بدال ما يريحونه بس ميخالف خلها على الله )) طبعا غير الدراسه في واحد يبيله اكتب موضوع كامل عنه مو واحد الا خمسه (( تقدر تقول عنهم اساسيين )) ولا اربعه الا سبعه الا اهمه محمد غفور وحسين القلاف ورضا العلي ومحمد الدوخي ومبين وعبدالهادي الحبيب وحسن عبدالحميد، محمد غفور انسان عجيب وايد.....ماني قايل بس الي لازم تعرفونه ان اهو الي كان معاي طول الوقت بالثانويه اهو الي انقذني بجم امتحان وتقدر تقولون ان عبقري بس من الزياده صار......، حسين القلاف اكثر واحد يحنج بس خوش واحد يوقف معاي بس تكفه لا تناقشونه، ورضا (( الحب 2 ) وما ادراك ما رضا ملاك على هيئة انسان طبعا الحين اهوا بالحسا الله يرده بالسلامه والدوخي حبيبي بس مشكلته (( راعي سوالف )) ويعتبر الدوخي من ضحايا استاذ الرياضيات ومبين الام الحنونه مبين بدونه الا احنا قاعد نتذابح مبين مصنع الحنان ومصنع الرفاهية الحياة بدونه ما تسوى شي والبادجيين بعد تعرفونه ...

بس صراحة احلى سنة دراسيه هالسنة وايد استانست تعرفت على شباب يدد وكنت احسن اني قاعد ادرس كنت قاعد احس ان استاذ الرياضيات باط جبدي كنت قاعد احس ان ودي اذبحه كنت قاعد احس بالضحكه لمن يقول انت مو صاحي كنت احس لمن يقول عني وانا ومحمد غفور انتم اذا دخلتم قرية افسدتموها بس ميخالف الله يسامحه بس حلاته يدرسني سنة الياي احتمال انتحر بس ما اقول الا خلها على الله.... وخذينا الشهادة اخير السنة والحمدلله كانت زينه اكيد بتطلع زينه على الدراسه الي درسناها..

في النهاية احب اعلن عن افضل صديق لي بالمدرسة صديق يمكن ما تتوقعون صج ان كان يبط جبدي ووايد يتفلسف على راسي بس وايد وقف معاي وفزع معاي كنا توم مع بعض كنا بالامتحانات اذا ما رفعنا التلفون وكلمنا بعض معجزة الا اهو محمد غفور صديقي وحبيبي صج ان احنا ربع كنا وايد مع بعض بس الحين ما يتصل ولا يسال الظاهر شغل معذور وحتى لو مكلمني راح ينحفر بقلبي ان في واحد اسمه محمد غفور وشكرا لاستماعكم ونلقاكم في يوم اخر (( اذاعة المدرسه ))